Cerpen Karo: Penyesalen Labo Erguna

Cerpen Karo: Penyesalen Labo Erguna
Karya: Haravikana Ansita Kaban

Ibas sada kuta lit sekalak pernanden tergelar Nande Gina. Ia enggo mbalu, rikutken lit sekalak anakna eme sitergelar Gina. Tiap wari Nande Gina lawes sekalak kujuma muat belanja sekolah Gina, seh kenca pe rumah ia kang si erdakan, anakna Gina labo terkena erkai pe, dahinna ku tiga, erinternet, ras gawah-gawah saja. Amin pe bage, Nande Gina tetap megenggeng ndalani kegeluhenna.

Ibas sada wari ngerana me Nande Gina man anakna

“O Gina, mare ge nakku, ngerana ateku kita,” nina ngerana dinger erlebuh man anakna

“Kai kin mak, lakin idahndu aku sangana main internet e?,” nina Gina ngaloi nandena dingen merampus.

“Egia kentisik saja mare nakku,” nina ka nandena dingenna cirem.

“Iah pagi pe banci nge…,” nina gina ngaloi nandena.

Kenca bage, lawes Nande Gina ku kamar. I tadingkenna Gina sekalak ibas ruang tamu. Ibas kamar, ertoto Nande Gina “Oh Tuhan, kai kin ndia salah ku makana bagenda perbuena percuban si ku aloken? Labo aku ngasup sisada ndalankenca. Alemi pusuhku Bapa, tetap tegu aku kudalanku. Amin!” nina ibas totona.

Dung ia ertoto laus me ia ku dapur nanggerken nakan ras gulen, sebab erkiteken wari pe enggo karaben, tapi anakna Gina lalap nge erinternet saja. Seh jam 7 berngi man meia duana ibas meja makan. Dung kenca man alu merampus Gina ngerana man nandena.

“Mak, enta sen sekolah ku, buena Rp500 ribu, sen pulsaku Rp50 ribu, ras pe sen jajanku Rp100 ribu,” nina man nandena.

“Andiko nakku, ja ka nge ku buat bagena lalana sen, idahndu nge dahinku pe kujuma ngeca, sen ta pe bias nukur berasa saja nge, ugalah ban pe,” nina nandena.

“E labo kuteh ena, pokokna pagi enggo lit, adi la pagi lit nangdangi laus ngen aku rumah enda nari,” nina Gina.

“Sabar kam nakku, banci ku usahaken,” nina nandena man Gina.

“Asal tuhulah katandu ena,” nina gina dingenna laus ku kamar medem nadingken nandena sekalak.

Pagi-pagina medak si Gina tapi la idapetina nandena i rumah, mamang kal atena janahna terdaram-daram ia. Kepeken nandena laus ndarami pinjamen man tetangga. Seh kenca i rumah nina nandena man anakna.

“Nakku, enda sen si pindo ndu nderbi, tutus atendu sekolah, ula lalapsa gawah-gawah,” nina mereken pedah.

“Ue, meter min nta enggo terlambat aku e, tah ja kam ndai nari!” Nina Gina ngaloi nandena.

Kenca lawes Gina ku sekolah dingen ayona pe berjut, maka jam 9 erpagi-pagi lawes me ate Nande Gina kujuma, tapi la iarapna rempet mesui kel akapna jantungna bagepe takalna, i lebuh-lebuhina tetangga tapi sada pe lalit si ngaloi. Alu erpala-pala lawes ia ku kamarna, janah i tulisna me surat man Gina si isina “Nakku, tutus ate sekolah, ula kel pagi teridah kam melumang. Adi kerna aku enggo tenang ras Dibata Bapa, kelengi banndu. Ngarak-ngarak kel tendingku man bandu,” nina isi suratna.

Dung kenca tulisna surat e lawes me ia nadingken doni, guna ngadap man Dibata, janah itadingkenna sen man belanja Gina.

Pulang sekolah, sengget kel si Gina perban idapetina nandena tergeltak ibas jabu. I pemedakna tapi lanai ngaloi, i jemakna nadina kepe lanai erdetak. Nderkuh ia perban nandena lanai lit.

Janah ibacana me surat si lit ibas diher nandena, janah ngerana ia “salah kel aku nande, la ku pernah ku begiken ajarndu, gundari enggo ku gejapken uga persuina ibas kam lawes e, aloi anakndu nande, aloi anak sisada e,” nina erbelas.

Gia bage nina Gina erbelas, tapi penyesalen na e enggo terlambat, Dibata enggo nikapken ingan man nandena.!

Pesan: Tupung ras nandenta denga kita, si ikutken lah ajar pedahna, sebab seh suina la ernande..!