Cerpen Karo: Gelarndu Lalap Bas Ingeten

Cerpen Karo: Gelarndu Lalap Bas Ingeten

Ia sekalak anak perana si seh kel bujurna, labo i tandaina latih. Ia kuliah jurusen musik ibas sada universitas i Medan. Keluargana labo si bergelimang harta, ia kost i Medan sedangken orang tuana tading i kuta muat biaya kuliahna. Selain kuliah ia ikut erperan ras teman-temanna ibas kegiaten budaya karo, musik Karo, bagepe ngajar les ibas sada ingan kursus musik. Dahin enda i lakokenna perban ia sadar labo kalak bayak, janah pe enda banci nampati orangtua guna nambahi biaya kuliah.

Gelarna emekap Prananta, biasa ia i lebuh Nata. Jelmana merupa, manis senyumna, rikut ramah kal ia man teman-temanna. Tiap wari ia ku kampus ras teman-temanna alu ukur si meriah. La i gejap enggo seh warina ia wisuda. Ibas ia wisuda e, sempat pe ndabuh iluh nandena ngidah keberhasilen si Nata. I cikepna tan Nata, janah nina ngerana “Nata…, anakku, endam ulih latihndu, ulih perjuangendu ibas nekhen sura-sura. Ula sia-siaken kai si enggo i datndu,” nina

Reh Nata ngaloi “Nande, kam kam kepe maka malemna, perbahan kerina pedahndu ras ajarndu maka aku banci bagenda. Labo i tandaindu latih guna man bangku,” nina janahna cirem.

“Ula lupa ertoto nakku, tetap erpengendes man Dibata,” nina ka nandena janahna ia pe cirem ka.

“Ue nande, sehat-sehat kam gelah g ejapkendu bekas latih ku e,” nina Nata janah i dakepna nandena.

Dua wari kenca wisuda, mulih nandena ku kuta, sedangken Nata tading i Medan guna ndarami dahin. Puji Tuhan piga-piga bulan kenca wisuda, ia i terima ngajar ibas sada sekolah. Kerina murid-murid bagepe guru-guru ibas sekolah e, ngalo-ngalo Nata alu meriah ukur.

Ibas pendahinna sebage guru, Nata ngajar alu tutus ate, la i tandaina latih, sebab ia sadar maka ia harus mbahagiaken nandena. Kerina murid-murid pe akrab kel ras ia. Ibas sekolah e, Nata ngajarken pelajaren budaya Karo begepe cara mainken alat musik Karo. Tupung istrahat ibas sekolah, rende-rende me ia ras guru sideban janah mainkenna kulcapi. Perban keleng kel ate muridna, sada wari saja ia la ngajar, minter terdaram kel kerina murid-muridna e.

Sada paksa pas pulang ngajar ibas sekolah, rempet melimber iakap Nata. Alu sekuat tenaga lawes ia ku rumah sakit guna periksa. Dung kenca periksa dokter, Nata i vonis ngidap penakit kanker otak. Gia tersengget kel pusuhna megiken vonis dokter nangdangi pinakitna, tapi kerna sie la i katakenna man nandena bagepe temanna. Janah ertoto ia mindopenampat man Tuhan.

Bagi biasa, jam 8 erpagi-pagi lawes ka me ia ngajar, mulih kenca ngajar nari lawes ia ku kursus musik, bageme pendahinna tep-tep wari. Perban wari libur, i bahanna janji ras temanna guna gawah-gawah ku Gundaling. Tapi ibas wari e, rempat ka melimber kel takalna mulih. I SMS na teman-temanna gelah acara e i tunda saja. Perbahan bage, mamang pe ate temanna ernin ia, janah kerina pe temanna e reh ku kostna.

Kenca seh ibas kost Nata, sengget pe kerina temanna ngidah ia pingsan. Janah pe minter i baba temanna e ia ku rumah sakit. Seh i rumah sakit i tamaken pe Nata ku ruangen ICU perban nina dokter, keadanna enggo kritis rikut ia dalam keadaan koma. I telpon teman-temanna orang tuana segelah minter ku Medan.

Seh i Medan nderkuh kel orang tuana perban nina dokter man bana “Ibu, kami sudah melakukan yang terbaik, tapi Tuhan berkehendak lain. Dia lebih sayang Nata dan tuhan tidak ingin Nata lebih lama merasakan sakit Kanker yang ada pada tubuhnya. Sabar ibu… Tuhan punya renca,” nina dokter mereken kata pengapul.

Reh nderkuhna pe nande nata, janah na ngerana man teman-teman Nata “Nakku, engkai maka la kataken kena man kami kerna si Nata sakit kanker?” Nina nungkun.

“Bik, kami pe labo i teh kami ia sakit, tiap wari nge ia ngajar, sabar kita bik ia enggo ras dibata,” nina teman Nata erjabab janahna tangis.

I cikep nandena tan Nata janahna erbelas “Selamat jalan nakku, seh kam ku Rumah Bapa. Lanai i nanamindu mesui, la kel i katakenndu sakitndu man kami,” nina.

Janah teman-teman Nata pe erbelas “Enggo kam sehat Nata, la kel terlupaken kami kam, janah gundari Tuhanlah jadi temandu,” nina janahna tangis kerina.

Pesan: Erbahan simehulilah sangat kita nggeluh i Doni enda, sebab kerina kita labo siteh rahasia Dibata…